ओमिक्रोनको असर सीमा क्षेत्रको बजार र पर्यटनमा


Bazar Dainik
8 January, 2022 5:30 pm

झापा, पुस २४ । कोरोना भाइरसको नयाँ भेरियन्ट ओमिक्रोनको असर नेपालको सीमा क्षेत्रको बजार र होटल व्यवसायमा देखा पर्न थालिसकेको छ । भारतमा संक्रमण बढेसँगै नेपालको सीमा क्षेत्रको बजारमा असर देखा पर्न थालेको हो । काँकडभिट्टा, भैरहवा, नेपालगन्ज, विराटनगर र वीरगंजको बजारमा भारतीय पर्यटकको आवागमन प्रभावित भएको छ । होटलहरुमा ग्राहक घट्न थालेका छन् ।

कोरोना संक्रमणको दर फेरि बढ्न थालेसँगै पूर्वी सीमानाकामा चेकजाँचमा कडाइ सुरु भइसकेको छ । यसले गर्दा भारतबाट नेपाल घुम्न आउने घट्न थालेका छन् । सरकारले क्यासिनो सञ्चालन गर्न स्वीकृति दिएसँगै होटल अकुपेन्सीमा हुन थालेको क्रमिक सुधारमा १५ दिन यता घट्न थालेको मेचीनगरको पाँचतारे होटल मेची क्राउनका सञ्चालक बलराम सापकोटाले बताए । “पहिले होटलको अकुपेन्सी पुरा हुँदै आएको थियो” सापकोटाले बजार दैनिकसँग भने, “अहिले नाकामा कडाई गरिएको छ । जसले ग्राहकसमेत घटाएको छ ।”

मेचीनगरस्थित होटल मेची क्राउन । तस्बिर : बजार दैनिक ।

तीन महिनायता भारतीय पर्यटकको आवगमन सहज भएसँगै सीमा क्षेत्रका होटल–रेस्टुरेन्टको व्यापार राम्रो हुँदै आएको थियो । नेपालमा पनि कोरोना संक्रमितको नमुना परीक्षणमा ओमिक्रोन भेरियन्ट पुष्टि हुन सुरु भएसँगै व्यवसायीमा चिन्ता सुरु भएको सापकोटाको बताउँछन् । मेची क्राउनमा भारतीय पर्यटकको सहभागिता उल्लेख्य हुँदै आएको थियो ।

संक्रमणदर बढ्दै गएपछि नेपाली व्यवसायीमा मानसिक असर देखापर्न थालेको बिर्तामोड उद्योग वाणिज्य संघका महासचिव अर्जुन मैनाली बताउँछन् । “लामो समयसम्म कोरोना झेलेका हामी व्यवसायी पुनः संक्रमण बढ्ने त्रासमा छौँ” मैनाली भन्छन्, “यसरीले संक्रणा बढ्दै जाने हो भने एक हप्तामा व्यवसायमा गिरावट आउने देखिन्छ ।”

भारतमा ओमिक्रोनको संक्रमण बढेसँगै पूर्वी नाकामा बढ्यो सुरक्षा । तस्बिर : बजार दैनिक ।

कोरोना संक्रमणको पहिलो र दोस्रो लहरले ठूलो नोक्सान खेपेको नेपाली पर्यटन क्षेत्रलाई तेस्रो लहरले पुनः फेरि एकपटक धक्का दिने पर्यटन व्यवसायी अर्जुन कार्की बताउँछन् । भारतमा ओमिक्रोनको संक्रमण बढ्दै गएपछि नेपाल आउने पर्यटकको चहलपहलमै गिरावट आउन थालिसकेको उनको भनाई छ ।

महाराष्ट्रमा मात्रै ४० हजार ९ सय २५ नयाँ बिरामी थपिएका छन् । नेपालसँग सीमा जोडिएको बंगालमा १८ हजार २ सय १३ नयाँ संक्रमित पाएका छन् । भारतमा बढ्दो संक्रमण दर देखिएको मामिलामा राजधानी दिल्ली तेस्रो नम्बरमा छ । दिल्लीमा कोरोनाका १७ हजार ३ सय ३५ जना नयाँ बिरामी पहिचान भएका छन् ।

भारतमा लगातार संक्रमण दर पुनः उकालो लाग्न थालेपछि आवागमनमा कडाइ सुरु भएको छ । यसको असर भारतको बंगाल, बिहार, उत्तर प्रदेश र उत्तराखण्डसँग जोडिएका नेपाली बजारमा पर्न सुरु भएको छ ।

प्रतिक्रिया दिनुहोस्